ESSÄNZ
Nid nur üsi wunderbarä Pflanzä mid ihrnä ätherischä Öl hend Essänzä. Au miär Mänschä bsitzid si. Äs brucht viel Achtsamkeit und Higab zum si z entdeckä. Si isch s'Wesentlichä vo dä Botschaft vo jedem einzelnä vo üs. Dä Chärn natürlich und pur. D'Essänz isch das wo blibt, wen du gasch.
Während dä Arbet uf dä Pfleg han ich nachämä Usglich i dä Natur gsuächt. Däzuä han ich ä riisigä Drang verspürt mich kreativ uszdrückä.
Ich bi sehr naturverbundä und liäbes z’wanderä und z’reisä. Starchi und chraftvolli Bilder hend scho immer mini Ufmerksamkeit erweckt. D Natur mid ihrnä traumhaftä Landschaftä hend ä unbändigi Nügir und äs Inträssi gweckt, sie gnau äso i z’fa wiä ich sie gse.
Ich ha s Liächt , d Formä und d Farbä besser kännä glernt und ha für mich mini ganz eigni Frorm vo Usrduck gfundä. Dä Usdruck vo minerä Liäbi zu dä Natur.
Vor sächs Jahr han ich diä erstä Ufträg entgägä gnu, wonich “Verliäbti” und “Familiämomänt” ha chönnä ifangä. Zwei Jahr später sind Hochziitä däzuä cho.
Ich ha Wiiterbildigä bsuächt, wo mis wüssä vertüft und erwiterät hend.
D Liäbi zum Momänt, isch mini Motivation, wen ich dich vor minärä Kamera ha.
Sid einigä Jahr begleitid mich ätherischi Öl mid ihrnä Essänzä i mim Alltag. Sie erschaffid Ruheoasänä, Sicherheit und hend i miär dä Hunger nach me Pflanzäwüssä agregt. Ich ha ä wiiteri Begeisterig entdeckt und ha ä Heilpflanzäschuäl bsuächt. Ich wet mich me im Iklang mid üsärä natürlichä Umwält bewegä und interessiärä mich für jeglichi Zyklä i dä Natur.
Jetzt bini gspannt wohi mich mini Reis füärt .
Schön bisch du ä Teil dävo.
